BAGUIO CITY- Siento porsiento a nakasaganan ti Baguio City Police Office (BCPO) a mangipatalged iti seguridad dagiti makipaset iti graduation rites ti PMA Bagsik-Diwa Class of 2022 intun bigat.
Iti interview ti Bombo Radyo Baguio kenni BCPO Public Information Office PLT.COL Judy Jasmin Palicos, kinunanga a nakasaganan ti plano dagitoy iti panakaipatalged met ti seguridad dagiti dumar-ay iti aktibidad pakairamanan ti security para kadagiti VIPs ken nangangato nga opisyal ti pagilian.
Kinumpirmarna met a malaksid kenni Presidente Rodrigo Duterte nga agserbi kas sangaili ti graduation rites, maimatangan ni DND Secretary Delfin Lorenza a nagserbi kas Guest of Honor Speaker iti naangay nga awarding kadagiti graduating cadets itay agsapa ken ti panagdar-ay met ni Anti-Red Tape Authority Secretary Jeremiah Belgica intun bigat.
Karaman pay nga impasiguradona ti panakaimanihar ti trapiko manipod kadagiti border checkpoints nangruna ta maysa daytoy kadagiti kadakellan nga event a dar-ayan ti publiko iti siudad.
Napakdaraan metten dagiti nagannak ken guardians dagiti kadete a sumrek iti siudad iti panagrehistroda iti online.
