BAGUIO CITY – Nakasaganan ti Baguio City Police Office (BCPO) para iti panagbantayda iti masungad a Panagbenga 2018.
Iti panakiyuman ti Bombo Radyo kenni PSSupt. Ramil Saculles, city director ti BCPO, kinunana nga agarup 800,000 agingga 1 million a turista manipud iti nagduduma a lugar ti manamnama nga apan agbuya kadagiti highlights ti Panagbenga.
Kinunana a gapu iti daytoy ket namnamaenda ti kina-agresibo dagiti nasao a tattao bayat nga inaklonna a dagiti umili iti lokalidad ti agsaksakripisyo tunggal dumteng ti pestibidad gaputa saan dagitoy a makabuybuya kadagiti tampok nga aktibidad.
Nupay kasta, dinakamatda a kanayon ti panangipaka-awatda kadagiti umili iti lokalidad a no mabalin ket maipaay ti gundaway kadagiti turista tapnu dagitoy ti agbuya iti festibidad.
Imbingayna nga addan ti nabukel a plano para iti panakaipaay ti seguridad dagiti sangaili manipud iti panagsangpetda ditoy siudad kadagiti paradaan agingga nga agleppas ti Panagbenga.
Innayonna nga adda metten ti plano para kadagiti maiwaras kadagiti parke ken kadagiti critical areas wenno choke points a pagsasabatan dagiti lugan.
Dinakamatna pay a kiniddawda ti panakibinnadang dagiti volunteers ken dagiti augmentation a pulis iti panakaimaton dagiti agbuya ken iti panakabantay dagiti kangrunaan nga aktibidad.
