Impetteng ti Baguio City Police Office (BCPO) a nakasagana dagitoy nga agresponde iti anyaman nga insidente a mapasamak iti siudad nangnangruna kadagiti pagadalan.
Daytoy ket kagiddan iti nagsasaruno nga insidente ti pammaltog ken kinaranggas kadagiti uneg ti pagadalan iti pagilian.
Sigun kenni PCol Ruel Tagel, City Director ti BCPO, sigud nga addan dagiti ipatpatungpal dagitoy nga active shooting drill kasta metlaeng ti nagduduma a simulation exercises tapno masigurado a sisasagana dagitoy iti anyaman a gundaway.
Kabayatanna, balligi a naipatungpal ti Aggressive Behavior and Safety Response nga adaan ti mantra a ” Run, Hide, Tell, Fight” no sadinno adda laeng dagiti kasapulan a pasayaaten tapno sumayaat pay ti contingency plan ti Baguio City National High School (BCNHS).
Iti sabali a bangir, binigbig ti opisyal ti pannakaikonsidera ti psychological impact iti nasao nga aktibidad tapno saan a maapektaran dagiti estudyante.
Kabayatanna, sigun iti Principal ti nasao a pagadalan, ti nasao nga aktibidad ket mangipakita iti preparedness, appropriate action ken napartak a panagresponde a mangisalbar iti biag.
Saan man a perpekto ti execution daytoy ngem impettengna a pagad-adalan daytoy tapno mapasayaat pay.
Innayon pay daytoy a gapu iti experience da iti nasao a drill, nakitana ti protocols ken wagas no sadinno maadaan iti proper coordination baben iti proper communication.
Agyamyaman met daytoy iti kapulisan, City Disaster Risk Reduction and Management Office (CDRRMO), ken dadduma pay a paset iti nasao a drill.
Iti sabali a bangir, impeksa met ni Mayor Benjamin Magalong a napateg ti papel iti pagadalan kas “First Responders” iti anyaman nga insidente a mapasamak iti uneg ti pagadalan.
Iti mensahe daytoy kalpasan ti pannaka-ipatungpal ti Aggressive Behavior and Safety Response idiay Baguio City National High School, dagiti maestra wenno ti school authority ti mangimanehar ken mangkontrol iti sitwasyon kadagiti umuna a minutos iti anyaman a pasamak bayat nga awan pay laeng dagiti law enforcers.
Impettteng ti Mayor a ti nasao nga aktibidad ket agserbi a lesson iti tunggal maysa.
Innayon pay daytoy a maipaayan ti prayoridad a pakaipatungpalan iti drills dagiti pagadalan a ‘high risk’ kadagiti insidente tapno maamuwan dagitoy dagiti rumbengda nga aramiden.
Inlawlawag met daytoy a ti pannakaisayangkat ti nasao nga aktibidad ket saan a tapno maipaayan danag dagiti estudyante nu diket maisuro dagitoy.
Ti nasao nga aktibidad ket indauloan ti Baguio City Police Office babaen kenni PCol. Ruel Tagel, City Director kadua ti nagduduma a police units daytoy kas iti SWAT-CMFC nga idadauloan ni PMaj Charly Galao-ey, BCPO Station 5 nga idadauloan ni PMaj Rolie Minas, Baguio City Government nga idadauloan ni Mayor Benjamin Magalong, City Disaster Risk Reduction Management Office nga idadauloan ni Engr Charles Bryan Carame, department head ti Beguio City Emergency Medical Services, City Health Services Office, ken daduma pay nga ahensya.
Nakipaset metlaeng ti sumagmamano a private psychologists manipud iti nasao a pagadalan.
Kabayatanna, naipatungpal met ti post-activity conference tapno maamuan dagiti rumbeng nga pasayaaten iti plano dagitoy. // via Bombo Noveh Organo
