Nakasaganan ti Baguio City Police Office para iti umadanin a panagturpos dagiti kadete ti Philippine Military Academy (PMA) Bagong Sinag Class of 2024 sadiay Fort Gregorio del Pilar, Baguio City inton Sabado, Mayo dise otso.
Iti panakiuman ti Bombo Radyo kenni PMaj. Harriet Bulcio, panakangiwat ti Baguio City Police Office, nakasaganan ti security operations dagitoy nangruna ket manamnama ti idadar-ay dagiti high-ranking officials a pakairamanan ni President Ferdinand “Bongbong” Marcos Jr., Vice President Sara Duterte, Department of National Defense (DND) Secretary Gilbert Teodoro, Chief of Philippine National Police (PNP) Police Major General Rommel Francisco Marbil, ken dagiti daduma pay nga opisyales ti Philippine National Police (PNP) ken ti Armed Forces of the Philippines (AFP).
Sigun kenni PMaj. Bulcio, agarup 500 a pulis ti maideploy iti siudad tapno masigurado a natalna ti panagturpos dagiti kadete kasta met a masigurado ti seguridad dagiti amin a makipaset iti nasao nga aktibidad.
Malaksid iti dayta, kinunana a nakasagana metlaeng ti mobility dagitoy kasta met a naka stand-by dagiti medical personnel.
Manamnama pay ti panangipaay ti Regional Force Battalion ken Highway Patrol Group ti kanayonan a personnel a mangimanehar iti gunay ti trapiko ken mangipasigurado iti linak ken kappia.
Kabayatanna, kinuna ni PMaj. Bulcio nga awan pay ti impormasyon dagitoy iti isasangpet ni President Marcos Jr. no daytoy ket babaen iti “by land” or “by air”.
Impasiguradona met nga ad-adda a nakasagana dagitoy.//Bombo Mera Pacpacan
