Nakasagana ti siudad ti Baguio a mangipabulod kadagiti sports facilities dagitoy iti SDO-Benguet para iti 2025 Cordillera Administrative Region Athletic Association Meet.
Dayta ket gapu ta agtaltalinaed a pakaseknan iti Probinsya iti Benguet ti kinukurang dagiti pasilidad a maaramat iti nasao a pasalip.
Iti interview ti Bombo Radyo kenni Niño Tibangay, Chief Education Supervisor iti Department of Education-Baguio, kinunana a naipatungpalen ti taripnong seknan iti nasao a banag.
Mainaig iti dayta, impetteng ni Tibangay a kasapulan latta a ma-in-house dagiti delagasyon dagitoy iti baet nga agkurkurang dagiti pasilidad a maaramat tapno maliklikan a madefault wenno maladaw dagiti atleta.
Gapu iti dayta, manamnama a ma-in-house ti delegasyon ti Baguio City sadiay Lucban.
Iti sabali a bangir, naisumitir metten dagiti amin a magastos kas iti panggatang kadagiti uniporme, transportation fee, insurance, training allowance, incentives, medications ken dadduma pay.
Kinuna ti opisyal nga adda dagiti dua a dentista a kadua dagitoy ken walo a nurses.
Innayonna pay a kasapulan dagitoy a mangitugot kadagiti ulesda ngem adda met dagiti foam a nakasagana nga aramaten dagitoy.//Bombo Rosemarie Bulsao
