Inlawlawag ni Baguio City Vice Mayor-elect Faustino Olowan nga awan pay ti naawatna a kopya ti maipadpadamag a disqualification case a naipila kontra kenkuana.
Iti interview ti Bombo Radyo Baguio, kinuna ni Olowan a nu adda man ti kaso a naipila kontra kenkuana ket ipaayanda koma daytoy iti kopya tapno ammona nu anya ti nagbalin a basaran dagiti nangidarum kenkuana.
Sigun pay kenni Olowan, naiproklamadan a nangabak iti kaleppas nga eleksyon isut gapuna a rumbeng koma nga idi paylaeng koma panagkakampanya a naipila ti disqualification case kontra kenkuana.
Impaganetget pay ti nasao nga opisyal a rumbeng a raemen dagiti nangidarum kenkuana ti rule of law.
Mainaig iti daytoy, inyebkas ni Olowan a dagiti nangidarum kenkuana ket isuda ti violator agsipud ta saanda a nagtulnog iti pagalagadan kas iti saan panang-ikkat iti post iti social media ken ti panangiwaras iti ayuda.
Iti baet ti nasao nga isyu, impanamnama ni Olowan nga ituloyna dagiti narugianna a programa ken proyekto iti siudad ti Baguio bayat ti panagtugawna kas bise mayor.//Bombo Rob Dominguez
