BAGUIO CITY – Naituding a mairikepen iti publiko ti Baguio Convention Center para iti panakaipasidong daytoy iti rehabilitasyon.
Sigun kenni Councilor Elmer Datuin, nakaawat ti lokal a gobyerno ti siudad iti paka-ammo manipud iti Department of Public Works and Highways – Cordillera seknan iti naan-anay a panakairikep ti pasilidad.
Kinunana a posible a makatawen a mairikep ti Convention Center, pakairamanan ti kagudua ti parking area iti kanito a marugianen ti rehabilitasyon.
Dinakamatna a karaman kadgiti maisayangkat sadiay ket ti panakaimuntar ti natural lighting ken bentilasyon, mapalawa ti parking area, manayonan ti seating capacity ken dadduma pay.
Masurot iti rehabilitasyon ti plano a naputar kalpasan ti feasibility study nga insayangkat ti lokal a gobyero ti Baguio ken ti pribado a sektor idi 2012.
Maipalagip a ginatang ti lokal a gobyerno ti convention center idi 2012 manipud iti Government Service Insurance System iti gatad a P250 million.
