BAGUIO CITY- Makumikom ita dagiti miembro iti Baguio Correspondents and Broadcasters Club para iti tinawen nga aktibidad dagitoy a panangpilida iti Lucky Summer Visitors (BCBC).
Iti interview ti Bombo Radyo kenni Dionisio Dennis, Presidente iti Baguio Correspondents and Broadcasters Club, kinunana a napintas ti panagsagana dagitoy ita a tawen agsipudta napintas ti klima.
Malaksid iti dayta, nakasagana metlaeng ti physical set-up ti Media Camp kasta met a nakaline up dagiti pagpasyaran dagiti mapili a Lucky summer visitors.
Maipatungpal ti panakapili dagiti lucky summer visitors intun April 17,2025 idiay Pugo, La Union.
Manamnama a mapili ti pito a pakaibilangan ti agkapamilia, grupo dagiti agbabarkada wenno aginnayan-ayat.
Impeksa ni Dennis a kasapulan a maipakaammo kadagiti mapagasatan a mapili a maipablaak dagitoy iti social media ken dadduma pay a media outlet iti rehion Cordillera.
Kabayatanna, panggep ti Baguio Correspondents and Broadcasters Club a maitandudu dagiti tourist destination iti siudad ti Baguio ken probinsia iti Benguet babaen iti panangipasyar kadagiti napagasatan a Lucky Summer Visitors.
Gapu iti dayta, naituding nga agturong dagiti mapili a bisita kadagiti pagpasyaran iti siudad kas iti Burnham Park, Dragon Treasure Castle, The Mansion House, Wright Park, Tam-awan Village.
Malaksid iti dayta, maipaayan dagitoy iti gundaway para iti forest dating iti Eco trail ti Camp Jhon Hay ken dadduma pay.
Kabayatanna, naituding metlaeng a maipasyar dagitoy kadagiti nagduduma a tourist destination iti probinsia iti Benguet kas iti Strawberry Farm ken Pugad ni Art iti Munisipio iti La Trinidad, Beacon Hill Eco park ken Polig Farm idiay Tublay.
Manamnama metlaeng nga agturong dagitoy iti Northern Bloosom iti met Munisipio iti Atok.
Impeksa ni Dennis a karaman kadagiti pagalagadan ti panangpili iti Lucky Summer Visitor ket rumbeng a napudno dagitoy ken sidadaan a mangsurot kadagiti schedule ti aktibidad.
Ti nasao a pagalagadan ket kas subad ti maipaay kadagitoy a red carpet treatment.
Ti nasao nga aktibidad ket mangrugi intun bigat, April 17, 2025 angingga intun April 20, iti agdama a tawen.//Bombo Marielle Pacio Apat
