BAGUIO CITY – Pagbalinen ti Department of Agriculture (DA) ti Baguio Dairy Farm kas maysa a dairy learning center ken maital-o pay para iti agritourism.
Inwaragawag daytoy ni Agriculture Secretary Emmanuel Piñol kabayatan ti panakitaripnongna kadagiti mayor iti Baguio ken Benguet.
Kinunana a kas maysa a learning center ket agserbi ti Baguio Dairy Farm a pag-adalan dagiti trainee ken dagiti ubbing seknan iti ‘dairying’ kas iti panag-ala ti gatas manipud kadagiti baka ken kalsding.
Dinakamatna a maipasdek ti maysa a hostel sadiay tapnu adda ti pagdagusan daiti sangaili nga agtaud iti nagduduma a paset ti pagilian.
Innayonna a mai-deliver to sadiay Baguio Dairy Farm ti kanayonan a 100 a baka nga addaan breed a Holsten para iti multiplier farm.
Kabayatanna, inkari ni Secretary Piñol ti P10-M a pondo para iti farm-to-market roads iti tunggal munisipyo ti Benguet, pakairamanan ti Baguio.
Inaprobaranna met ti kiddaw dagiti kaaduan a mayor iti Benguet a kas iti machineries, equipment ken post-harvest facilities.
