BAGUIO CITY – Amyendaranen ti lokal a konseho ti Baguio ti maipatpatungpalen a Face Mask and Face Shield Ordinance of 2021 ti siudad.
Kasaruno daytoy ti panangkiddaw ti mayor iti panaka-amyendar ti nasao nga ordinansa tapnu maisardengen wenno saan ket malimitaran ti panagaramat ti face shields ditoy siudad.
Sigun iti bise mayor, maiparang ti draft nga inaramid ti dadaulo ti Committee on Health and Sanitation, Ecology and Environmental Protection iti sesyon dagitoy inton sumaruno a lawas.
Nupay kasta, kinuna a posible a mabaliwan ti draft a naaramid gaputa agdependar dagitoy iti desisyon ti National IATF.
Kinunana nga inton Lunes ket manamnama a maaprobaran iti umuna a panagbasa ti naamyendaran a Face Mask and Face Shield Ordinance of 2021 ti siudad.
Dinakamatna a karaman kadagiti agbalin a panagbaliw iti ordinansa ti probisyon a maaramat laeng ti face shield kadagiti close places kas kadagiti pagagasan, isolation centers ken triage facilities kas maitunos iti pammilin ti IATF.
Tarigagayda pay nga inayon iti ordinansa ti panagaramat ti face shield iti panaglugan kadagiti parapubliko a transportasyon.
Impettengna nga ar-aramidenda daytoy para iti pagsayaatan dagiti umili ti siudad.
