BAGUIO CITY – Manamnama ti panakaipila ti lokal a gobierno ti Baguio City ti kaso kontra iti DPWH-Baguio District Engineering Office gapu iti mapapati a substandard a proyekto ti ahensia iti siudad.
Gapu daytoy kadagiti kinuna ni Mayor Benjamin Magalong a substandard a proyektoda kadagiti sidewalk iti kalkalsada ti siudad.
Nadismaya ti mayor gapu iti naduktalanda a substandard projects iti paset ti Leonard Wood Road, Bonifacio ken South Drive nu sadinno masaysayang laeng dagiti pondo.
Desidido ti mayor a mangipila ti kaso iti DPWH-Baguio District Engineering Office gaputa agtultuloy ti palya wenno palpak a proyekto dagitoy tapnu dagus a maisardeng ti mapaspasamak a korapsion kadagiti substandard a proyekto.
Inyunay-unayna nga awan ti napintas a pagbanagan ti maysa nga proyekto nu dikdiktaran ti kontraktor ti ahensia.
Impanakelna pay nga adayu a dekalidad ti sidewalk project ti lokal a gobierno ti Baguio City nu idilig iti DPWH.
Ur-urayenda met ti aksion ti DPWH Central Office kalpasan nga impaka-ammoda ti maatap a sistema nga ipatpatungpal ti DPWH-Baguio District Engineering Office sumagmamanon a tawen ti napalabas.
