BAGUIO CITY – Nakasaganan dagiti programa ken proyekto para kadagiti agtutubo a kayat nga ipatungpal ti nabotosan a presidente ti SK Federation ti Baguio City.
Iti panakiyuman ti Bombo Radyo kenni Barangay South Central Aurora Hill SK chair Levy Lloyd Orcales, kinunana a kangrunaan a tutukanna ti tay-ak ti edukasyon ken ti salun-at dagiti agtutubo.
Sigun kenkuana, tutukanda dagiti scholarship grants tapnu masigurado a maidanun dagitoy kadagiti agtutubo a kayatda a talaga ti agadal ken maiparbeng a matulongan.
Panggepna met a mapagbalin a linteg ti panakabukel dagiti learning research centers kadagiti unibersidad iti siudad tapnu adda ti maasitgan ken pagpatulongan dagiti agtutubo nga estudyante a marigrigatan iti subject dagitoy.
Tarigagayna pay a mapaayaban iti lokal a konseho dagiti pribado nga unibersidad tapnu agpalawag dagitoy iti regular a panakaipangato ti matrikula dagiti estudyante bayat a tulonganda dagiti estudyante a kayatna ti sumrek kas working student.
Innayon pay ni Orcales a kayatna nga irtengan ti kampanya seknan iti reproductive health ken teenage pregnancy tapnu manayonan ti panaka-ammo dagiti agtutubo seknan iti epekto ti premarital sex ken tapnu maliklikan ti panagngato ti bilang dagiti agtutubo nga agbalbalin nga inna.
Kabayatanna, dinakamatna a tarigagayna ti panakabukel dagiti diversion programs para kadagiti agtutubo tapnu ad-adda a mapadur-as ti abilidad ken laing dagiti agtutubo kagiddan ti panakailiklik dagitoy manipud iti saan a nasayaat nga aramid.
Kinunana a babaen kadagiti nasao a programa wenno aktibidad ket mailiklik wenno maiyadayo dagiti agtutubo ti siudad manipud iti aniaman a kita ti sulisog.
Innayonna a patibkerenda dagiti sports activities ti siudad tapnu maipaayan iti umdas nga access dagiti agtutubo kadagiti sports facilities malaksid pay a maipaayan dagitoy iti livelihood training kagiddan ti nairtengan a kampanya kontra iti iligal a droga.
Impasigurado pay ni Orcales a dagiti ipatungpalda a programa, proyekto ken aktibidad ket ‘relevant’ ken ‘timely’ tapnu maala ti atension dagiti agtutubo ken makipasetda kadagitoy nangruna no makatulong kadakuada.
