BAGUIO CITY — Marigatan ti Baguio Health Department a mangipatungpal iti panagbakuna kontra iti measles wenno kamuras ditoy siudad ti Baguio.
Iti panakiyuman ti Bombo Radyo Baguio kenni Dra. Rowena Galpo, dadaulo ti Baguio Health Department, kinunana nga adda dagiti nagannak nga agduadua iti nasao a bakuna.
Kinunana a saan a maikkat ti panagdanag dagiti nagannak iti agbalin a negatibo nga epekto ti nasao a bakuna kadagiti annak dagitoy gapu paylaeng iti isyu ti kontrobersial a dengue vaccine a Dengvaxia.
Gapu iti daytoy, kinunana a saanda a nagun-od ti puntiryada a bilang ti mabakunaan nga ubbing.
Inlawlawagna a panggep daytoy a bakuna a masalakniban ti salun-at dagiti maladaga nga agtawen 6 agingga 59 a bulan kontra iti tigdas.
Innayunna a libre ti bakuna a maipaay ken door to door wenno mabalin nga agturong dagiti nagannak ken anak dagitoy kadagiti health centers tapnu maipaayanda iti nasao a bakuna.
Impasiguradona iti publiko a natalged ti bakuna nga ipapaay dagitoy iti publiko.
Inlawlawagna a kasapulan a masalakniban dagiti ubbing kontra iti tigdas nangruna ta daytoy ti maysa a kangrunaan a sakit a mapaspasaran ita a panawen.
