BAGUIO CITY – Sumangsango ita iti kaskenan a kaso ti maysa a balasang ken ti sigud a nobyona kalpasan a nag-viral iti lokalidad ti video footage ti maatap a panaka-kidnapna sadiay Barangay Dizon Subdivision, parbangon ti May 6.
Sigun kenni outgoing Baguio City Police Office, City Director PCol. Allen Rae Co, naduktalan iti imbestigasyonda a plinano a mismo ti nasao a balasang ken ti suspek a sigud a nobyona ti insidente.
Immuna iti daytoy, nangitunda iti panagdanag ken panagbuteng kadagiti residente iti lokalidad ti nagwaras iti social media ti video footage manipud iti maysa a CCTV camera a pakakitaan ti pannagna ti balasang ken ti dua pay a kadwana, ti panagsardeng ti van iti batogda ken ti panakaiguyod ti biktima pastrek iti lugan.
Kinuna ni Col. Co nga iti imbestigasyonda ket maysa a ‘kidnap me’ scheme a plinano ti balasang ken ti sigud a nobyona tapnu maiyaw-awan ti pamilya ti balasang gaputa saan a kayat dagitoy ti relasyon ti dua.
Naduktalan pay iti imbestigasyon a karuruar laeng ti suspek iti pagbaludan.
Inted met ti nasao a lalaki iti pulisya ti kopya dagiti screenshots ti text messages iti nagbaetanda iti balasang a pakabasaan iti panagplanoda iti insidente.
Sigun kenni Col. Co, paset daytoy ti panagbabawi ti lalaki iti inaramidda ken iti nagbalin nga epekto daytoy iti publiko.
Nupay kasta, kinunana nga asinoman nga agaramid ti biddut a report ken palso a krimen ket sumango iti kaskenan a pannusa gaputa panagsayang laeng daytoy iti resources ti pulisya, nangruna ti panawen a mabusbos iti panagimbestigar dagitoy.
