BAGUIO CITY – Nakemmeg ti maysa a babai a maatap a kameng ti New People’s Army (NPA) gapu iti panagimetna iti bala ti paltog ken subversive wenno revolutionary documents sadiay Cypress, Irisan, Baguio City.
Ti suspek ket agtawen iti duapulo ket innem, awanan iti asawa, tubo ti Pangasinan ken residente iti nasao a lugar.
Segun iti pulisya, nakaawatda iti impormasyon seknan iti nasao a maatap a kameng ti rebelde a grupo.
Ggapu iti daytoy ket nagtitipon ti puersa ti Baguio City Police Office Station 9, Crime Investigation Unit, City Public Safety Company ken dadduma pay a law enforcement offices ken nakikoordinarda kadagiti opisyales ti nasao a barangay.
Iti panangrebbekda iti siled ti suspek ket nakumpiskarda ti dua a bala ti cal. 45 ken nagduduma a subersibo a dokumento.
Naipasidong iti inquest proceedings ti suspek gapu iti panaglabsingna iti Article 5, section 28 ti Comprehensive Firearms and Ammunition Regulation Act.
