BAGUIO CITY – Nakemmeg ti maysa a balasang a negosyante kalpasan ti maatap a panangiserrekna iti iligal a droga iti uneg ti Buguias District Jail sadiay Buguias, Benguet.
Nabigbig daytoy a ni Jema Dino Aguinao alias Jema Aguinao Cudlas, agtawen iti 25, balasang, negosiante, tubo ti Tinoc, Ifugao ken residente ti Abatan, Buguias, Benguet a nabigbig a newly identified drug personality.
Maibasar iti report ti Buguias Municipal Police Station, sarungkaran koma ti suspek ti balud a ni Marvin Cudlas a maysa a high-value indibidual.
Nupay kasta, idi nakapkapan ti balasang ket naduktalan ti naka-duty a jail guard a ni Senior Jail Office 1 Marjorie Longbian Bigwel a nakaimet daytoy iti iligal a droga ken drug paraphernalia.
Nakumpiskar kenkuana ti tallo a pidaso ti naka-rolyo nga aluminum foil, maysa a transparent cellophane a naglaon iti nagango a marijuana nga agdagsen iti 3.76 grams ken aggatad iti P451.
Nakumpiskar pay kenkuana ti maysa a pakete a naglaon iti maatap a shabu nga agdagsen iti 1.26 grams ken aggatad iti P10,880.
Sigun iti Buguias MPS, amin dagiti nakumpiskar a kontrabando ket naidulin iti loaf bread nga imet ti suspek.
Naiturong ti nakemmeg a balasang ken dagiti nakumpiskar a kontrabando iti Buguias MPS para iti dokumentation ken pannakaipila ti kaso kontra iti suspek.
