BAGUIO CITY – Sumangsango iti kaso a panaglabsing iti Comprehensive Dangerous Drugs Act of 2002 ti maysa a balasang kalpasan a natiliw iti rug buy-bust operation nga impatungpal ti Philippine Drug Enforcement Agency-Cordillera sadiay City Camp Proper ditoy siudad ti Baguio idi kalman.
Nabigbig daytoy a ni Maricel Mangalos Porcioncula, 22-anyos, balasang ken residente ti Tuding, Itogon, Benguet.
Nakalibas met ti dua a kadwa daytoy gaputa ni Porcioncula laeng ti bimmaba iti lugan nga inaramatda iti transaksyon.
Nakumpiskar iti suspek ti maysa a sachet a naglaon ti agarup maysa a gramo ti shabu, maysa a pidaso ti genuine P1,000 bill ken siam a pidaso ti P1,000 a boodle money.
Naamuan nga immunan a natiliw ti suspek gapu iti kapada a kaso ngem nawayawayaan kalpasan a naibasura ti kaso daytoy.
