BAGUIO CITY – Pimmusay ti maysa a balasang kalpasan nga aksidente a nadungpar daytoy ti maysa a parapasahero a bus nga addaan ruta a Baguio-Kibungan sadiay Lower Magsaysay Avenue, Baguio City idi kalman.
Nabigbig daytoy a ni Edna Mangulay Loot, 24-anyos, awanan asawa ken residente ti Wangal Extension, La Trinidad, Benguet.
Nabigbig met ti driver ti bus a ni Melchor Batel-ey, 46-anyos, naasawaan ken residente ti Balakbak, Kapangan, Benguet.
Maibasar iti report, manarimaan ti panagballasiw ti biktima iti kalsada idi aksidente a nadungpar ken naatalan daytoy ti nasao a bus.
Dagus a naiturong ti biktima iti pagagasan ngem pimmusay metlaeng daytoy gapu kadagiti nasagrapna a dunor.
Naamuan a nakaro a nadunor ti ulo ti biktima ken ti dadduma a paset ti bagi daytoy.
Sigun kenni PCI Oliver Panabang, dadaulo ti Traffice Enforcement Unit ti Baguio City PNP, nakabaluden ni Batel-ey gapu iti kaso daytoy a reckless imprudence resulting in homicide bayat a nai-mpound met laeng ti nasao a bus.
Gapu iti daytoy, ipalpalagip manen ni PCI Panabang ti kanayon a panagridam ken panagannad dagiti umili iti panagballasiwda kadagiti kalkalsada.
Inyunay-unayna nga adda dagiti overpass ken dagiti nabigbig a pedestrian lanes a pagnaan tapnu maliklikan ti aniaman nga aksidente.
