BAGUIO CITY – Pimmusay ti maysa a balasitang kalpasan a nalmes daytoy iti maysa a resort sadiay Lower Maton, Pudtol, Apayao idi kanikadua.
Nabigbig daytoy a ni Christine Joy Torrejas, 18-anyos ken residente ti Mabuttal East, Ballesteros, Cagayan.
Maibasar iti report, adda iti nasao a resort ti biktima ken ti pamilyana tapnu agrambak ken nagturong iti karayan sadiay ti biktima ken ti kasinsinna tapnu aglangoy.
Nupay kasta, bayat ti panaglangoy ti biktima iti narabaw a paset ti karayan ket aksidente daytoy a naikadlis iti nagalis a bato iti uneg ti danum agingga a naiyanod paturong iti nauneg a paset ti karayan.
Nakita met ti kasinsin ti biktima ti napasamak isut gapuna a dagus daytoy a nagpaarayat kadagiti kakaduada nga adda iti cottage ti resort.
Dagus dagitoy a nagresponde ngem sadiay a nadanunanda ti tumtumpaw a bagi ti biktima iti karayan.
Inturong met dagiti pulis ti biktima iti pagagasan ngem naideklara daytoy a dead on arrival.