BAGUIO CITY – Im-imbestigaran dagiti pulis ti pakabigbigan ti indibidual a nangserrek ken nagtakaw iti napapateg a gameng iti uneg ti pagtaengan ti pamilya ti kadwada a pulis sadiay Ciudad Grande, Bakakeng Sur, Baguio City idi kanikadua.
Maibasar iti report, nadlaw ti live-in partner ni PSSgt. Danny Bomogao, 40-anyos ken personnel ti Baguio City Police Office a naiwara ti shoulder bag daytoy iti attic iti maikatlo a kadsaaran ti balayda.
Nadiskobrena pay a mapukpukaw ti maysa a bag-na a naglaon ti napapateg nga IDs, dokumento ken wallet a naikabil iti asideg ti kamada.
Naduktalanda metlaeng a mapukpukaw ti body bag ti pulis a naikabil iti abay ti kamada a naglaon ti paltog ken wallet a naglaon ti nagduduma mga ID cards malaksid iti dua a cellphone ti annakda nga aggatad ti agarup nasurok P30,000 a nakakabil iti bukod a silid dagitoy.
Sigun iti pulisya, inlukat ti suspek ti main gate ti balay sakbay a nagturong iti main door iti maikadua a kadsaaran sakbay a napan iti maikatlo a kadsaaran nga ayan ti silid dagiti biktima a nangalaanda kadagiti nasao a gameng.
