BAGUIO CITY – Binigbig dagiti nagduduma nga organizers dagiti community pantries dagiti stakeholders dagitoy gapu iti balligi ken napintas nga epekto dagiti naibangon a community pantries iti nagduduma a paset ti lokalidad.
Iti eksklusibo nga interview ti Bombo Radyo Baguio kenni Khristine Molitas, Corporate Secretary ken co-founder ti Bayanihan Cordillera, partikular a binigbigna ti kontribusyon dagiti volunteers ken amin a mangidondonar kadagiti produkto a maipadpadawat kadagiti agkasapulan.
Kinunana a babaen iti agtultuloy a panagur-orda kadagiti donasyon ket maipapaayan iti nateng, prutas ken groceries dagiti benepisyaryo ti organisasyon a pakairamanan dagiti napukawan iti panggedan, dagiti awanan ti pagtaengan, dagiti agpalpalimos ken dagiti karaman iti grassroot levels kas kadagiti mannalon ken taho vendors.
Imbinglay ni Molitas a nasuroken iti makatawen ti operasyon ti Bayanihan Cordillera babaen iti community kitchen a proyektoda nga itan ket naawagan a community pantry, no sadino sigud a relief packs ti ipapaayda a tulong malaksid pay nga aglutluto dagitoy para kadagiti frontliners kadagiti checkpoints ken ospital.
Innayona a kabayatan ti pandemya ket nakatulong metten ti organisasyonda kadagiti kabangibang a munisipyo babaen kadagiti impatulodda a medical equipment kas iti PPEs ken face masks malaksid pay kadagiti probinsia ditoy pagilian a dinalapos ti kalamidad.
Kagiddan iti daytoy, aw-awisen ni Molitas dagiti naayat a mangidonar kadagiti taraon ken kangrunaan a pagkasapulan tapno agturongda iti pantry dagitoy a masarakan sadiay Baguio City Hall.
Ti Bayanihan Cordillera ket maysa a civil society organization a mangipapaay kadagiti charitable activities ken social action movements iti intero a rehion, iti panakikoordinarda kadagiti nagduduma a sektor para iti relief operations a mangsupsuportar kadagiti frontline workers.
Mangipatpatungpalda pay iti trading activities para kadagiti mannalon a naapektaran ita agdama a krisis ti salun-at.
Ti community pantry ti Bayanihan Cordillera ket pormal a naiyusuat idi Sabado ken aglukat daytoy agingga nga agtultuloy ti suporta dagiti naayat a tumulong kadagiti agkasapulan.
VC MOLITAS 2
Kabayatanna, impeksana ti saanda a panagkanunong iti rekomendasyon a kasapulan nga agala iti permit dagiti indibidual wenno grupo a mangilukat ti community pantry.
Impettengna a saanen a kasapulan ti panagalada ti permit nupay nasken nga adda ti komunikasyon wenno koordinasyonda iti maseknan a lokal a gobyerno.
Dinakamatna a saan a garantiyaan ti permit ti saan a panakaikompromiso ti seguridad ti kaaduan.
Nupay kasta, dinakamatna a sidadaan latta dagitoy nga agtungpal iti pammilin ti gobyerno la ketdi nalaka ken saan a narikut ti proseso iti panagalada ti permit tapno awan ti rumsua a parikot.
Sigun kenkuana, maawatanda ti panggep a panakaikalikagum ti permit dagiti community pantry organizers kas maitunos iti paglintegan seknan iti COVID-19.
