BAGUIO CITY – Naiturongen sadiay La Union ti maysa a pugante a drug suspect ken maibilbilang a No. 4 Most Wanted Person ti Agoo, La Union kalpasan a natiliw daytoy sadiay Middle Quirino Hill, Baguio City idi kanikadua.
Nabigbig daytoy a ni Teofilo Lopez alyas Chantal, 25-anyos, tubo ti Agoo, La Union ken residente ti Middle Quirino Hill, Baguio City.
Nakemmeg daytoy babaen iti bileg ti warrant of arrest nga inserbi ti nagtipon a pwersa ti PDEA-Cordillera, Agoo Municipal Police Station, Baguio City Police Office Station 2 ken dadduma pay nga yunit ti pulisya.
Immunan a natiliw ni Lopez idi November 6 sadiay Agoo, La Union ngem bayat nga addada iti uneg ti police vehicle paturong iti La Union Medical Center para iti check-up ket maatap nga inikkatna ti facemask-na ken naguyek iti sangwanan a mismo ti police escort-na.
Gapu iti daytoy, impasardeng ti nasao a police escort ti lugan para iti disinfection ngem ginundawayan met ni Lopez ti naglibas.
Naduktalan a nagturong daytoy ditoy Baguio tapnu aglemmeng ngem nasarakan latta daytoy ti tracking team ti pulisya.
