BAGUIO CITY – Manarimaanen ti contact tracing ken panakaipatungpal dagiti isolation measures iti uneg ti Baguio City Jail – Male Dorm kasaruno ti panagpositibo ti maysa a kabarbaro a balud sadiay.
Inlawlawag ni Senior Jail Officer 3 Julius Garlejo a sakbay a naipisok iti pagbaludan ni Bernard Agbuya, 25-anyos ken residente ti Apugan, Poliwes, Baguio City ket naipasidong daytoy iti rapid test para iti COVID-19.
Kinunana a negatibo ti resulta ti rapid test ni Agbuya isut gapuna a nagtalekda a nangipalubos iti panakaibalud daytoy iti Baguio City Jail – Male Dorm idi May 29.
Innayonna a kadagiti dokumento ni Agbuya ket awan ti nailanad a note wenno paka-ammo manipud iti Department of Health a naipasidong daytoy iti swab test ken idi laeng rabii a rimwar ti resulta a positibo ti swab test daytoy.
Sigun kenkuana, inruardan ni Agbuya manipud iti pagbaludan para iti panakataming daytoy iti pagagasan.
Aw-awganda met ti imatang dagiti tattao a simmarungkar iti nasao a pagbaludan manipud May 29 agingga May 31 iti dagus dagitoy a panakikoordinar iti Baguio City Health Office wenno iti contact tracing team ti Baguio City Police Office. (-report from Bombo Razced Pagoli)
