BAGUIO CITY – Mapilpilaan ita dagiti bangka sadiay Burnham Lake ken dagiti bisikleta iti deppar ti biking area ditoy siudad ti Baguio.
Intunda daytoy ti panag-ado dagiti turista a nagturong ditoy siudad kagiddan ti holiday season.
Naamuan nga iti biking area ket agdidinnungparen dagiti bike gaputa nailet ti espasyo para kadagitoy.
Segun met kenni Vivian Celso, maysa kadagiti agpapa-abang iti bangka iti Burnham Lake, kadagiti napalpalabas nga aldaw ket bassit laeng dagiti turista nga agab-abang kadagiti bangkada ngem nangrugi idi kalman ket killaat dagitoy nga immado.
Kinunana a gapu iti daytoy ket nakapila dagiti agtartarigagay nga agbangka isut gapuna a naaddaan dagitoy iti tickets ken numbers.
Impanakkelna met nga iti agdama ket awanen ti parikut kadagiti bangkada gaputa naisimpa dagitoy malaksid pay iti panakapapintas ti pintor dagitoy.
