BAGUIO CITY – Nabigbigen ti bangkay a nasarakan iti Andres Cosalan Road sadiay Toking, Poblacion, Buguias, Benguet idi Sabado, December 12.
Sigun kenni PSSgt. Emson Saltin manipud iti Buguias Municipal Police Station, nabigbig ti bangkay a ni Rogelio Cabico Bagtas, 41-anyos, balo, laborer/fruit vendor ken residente ti Lower Guiwe Street, Poblacion, Mankayan, Benguet.
Binigbig daytoy ti kabsatna a ni Ricky Bagtas, 43-anyos, naasawaan, tricycle operator ken residente metlaeng iti nasao a lugar.
Kinuna ni PSSgt. Saltin a naiyawiden ti bangkay ni Bagtas sadiay Mankayan.
Naamuan a pimmanaw ni Bagtas iti pagtaenganda idi Huwebes tapnu agtrabaho ngem saanen a nagaw-awid agingga a nasarakan laengen ti bangkayna iti igid ti kalsada nga addaan kauneg nga uppat a metro ken daytoy ket nagsagrap ti dunor iti ulo, dua a tama ti bala ti paltog ken nabekkel.
Maibasar met iti rekord ti pulisya, ni Bagtas ket drug surrendere ti Mankayan idi April 2018 ken nakompletona ti rehabilitation program idi August 2019 ngem nakemmeg bayat ti implementasyon ti search warrant gapu iti panaglabsing kadagiti linteg iti iligal a droga ken armas idi November 2019.
Nakumbiktar daytoy babaen iti plea-bargaining agreement idi September 2020 ken nagpetisyon para iti probation a napatgan met iti kapada a bulan agingga a nawayawayaan manipud iti pagbaludan idi October 7.
