BAGUIO CITY – Nabirukanen dagiti agkabsat a Gonzalo a naiyanod iti Chico River sadiay Tabuk City, Kalinga, uppat nga aldaw ti napalabas.
Maibasar iti report, immuna a nabirukan ti bangkay ni Frank Smith Gonzalo, 17-anyos iti Chico River Line iti asideg ti Barangay Lanna, Tabuk City.
Nabirukan daytoy idi agsapa ken naipaima metten ti bangkay iti pamilya daytoy.
Iti panagtultuloy ti search and retrieval operation iti manangna a ni Maybelle Gonzalo, 22-anyos, nasarakan ti bankay daytoy itay malem.
Maipalagip a nagturong ti agkabsat ken dadduma a kabagianda iti nauneg a paset ti karayan tapnu aglangoy ken agala ti ladawan.
Nupay kasta, nadlawda laengen a maiyan-anod dagiti dua isut gapuna a ginandatda nga ispalen dagitoy ngem napaayda gapu iti napigsa nga ayus ti danum.
Naamuan a dumanon iti nasurok 130 a rescuers manipud iti nagduduma nga organisasyon ti nagtitinnulong tapnu mabirukan ti agkabsat.
Nakiddaw payen ti tulong ti Philippine Coast Guard manipud Region 2 tapnu tumulong iti search and retrieval operation.
