BAGUIO CITY – Maitabon inton bigat, April 25 ti bangkay daydi 2nd Lt. Ralf Amante Abibico a maysa kadagiti tallo a soldado a pimmusay iti engkwentro iti nagbaetan ti militar ken dagiti kameng ti New Peoples Army sadiay Carabalan, Himamaylan City, Negros Occidental idi April 19.
Maipalagip a naibiahe ti bangkay ti Abibico iti pagtaenganda sadiay Mount Data Cliff, Bauko, Mountain Province idi kanikadua.
Sigun kenni PLt.Col. Jomarick Felina, dadaulo ti Mountain Province Provincial Mobile Force Company, maipaayan ti Igorot army officer iti heroes burial kas panangbigbig iti kina-banuar-na.
Dinakamatna a napalubusan ti panakaibantay wenno panakalamay ti bangkay ti banuar a soldado iti sumagmamano nga aldaw.
Nupay kasta, inaklonna a kinnidawda a saan unay a bumayag ti panakalamay ni Abibico tapnu maliklikan ti panaka-urnong dagiti adu a tattao gapu iti manarimaan nga enhanced community quarantine.
