BAGUIO CITY – Malamlamayan ita ti bangkay daydi PCol. Michael Bawayan Jr. iti pagtaengan dagitoy sadiay Brookside, Baguio City kalpasan a naisangpet daytoy itay agsapa.
Naipaayan met daytoy iti pamisa kadwana dagiti pamilya ken kakabsatna a nangpasangbay iti bangkayna sadiay Loakan Airport sakbayda a naipasidong iti triage sadiay Baguio Convention Center dagiti pamilyana ken katrabahona a nagtaud sadiay Sulu ken naiyawid iti pagtaenganda.
Naituding a maitabon ti bangkayna intun Sabado sadiay Pyramid Cemetery, Buyagan, La Trinidad.
Naamoan a ni PCol. Bawayan ket karaman iti PNPA Class of 1996 ken nangrugi a nagserbi kas Provincial Director ti Sulu idi Marso 2020 agingga koma iti agdama.
Maipalagip a pimmusay ni Sulu PNP Provincial Director, PCol. Michael Bawayan Jr. , 49-anyos, tubo ti Mountain Province ken residente iti Baguio City kalpasan a paltogan ni Police Staff Sergeant Imran Jilah.
Iti inisyal nga imbestigasyon ti PNP, naamuan a mangipatpatungpal iti inspeksyon ni Bawayan iti QCP Big Bites sadiay Barangay Asturias, Jolo, iti malem ti Biyernes Agsoto 6 idi mapapati a pinaltogan daytoy ni Jilah.
Bimmales dagiti security aides ti Cordilleran a PULIS ken pinaltogan da ni Jilah a nagresulta iti dagus nga ipupusay daytoy.
Dagus met nga inbilin ni PNP Chief, PGen. Guillermo Eleazar ni PNP Regional Director for the Bangsamoro Autonomous Region (BAR) PBGen. Eden Ugale tapnu mangbukelda iti Special Investigation Task Group (SITG) iti regional level a makikoordinar para iti imbestigasyon dagiti maseknan a PNP units iti nasao nga insidente.
Kabayatanna, malaksid iti impadakon ti lokal a gobierno ti Mt. Province a pannakipagladingit iti pamilya ni PCol Bawayan Jr., naideklara pay ti walo nga aldaw ti panag-ngilin iti munisipyo ti Sagada a nangrugi met idi kalman.
