BAGUIO CITY – Nasarakan ti maysa a bangkay iti deppaar ti Access Road sadiay Purok Suyoc, Loakan Proper, Baguio City idi agsapa.
Maibasar iti blotter ti pulisya, nasarakan ti maysa a retirado a pulis ti nakaidda a tao nga arigna natayen kabayatan ti panagtarayna iti nasao a kalsada.
Dagus nga inyawagna ti nasao a banag iti istasyon ti pulisya.
Sigun iti pulisya, ti bangkay ket mapattapatta nga agtayag iti 5’4, nakasuot iti nangisit a maong pant ken maysa a pidaso ti nalabbaga nga slipper.
Partikular a pakailasinan ti bangkay dagiti adu a tattoo daytoy kas iti termino a ‘TRIBAL’, flower leaf iti outer palm, baraha ken bituen iti kannigid a takkiag ken maysa a ladawan ti rupa ken nagan nga ‘ION” a nai-tattoo iti abaga ken barukong daytoy.
Umap-apela met ti pulisya kadagiti posible a makailasin iti bangkay para iti panagturongda iti istasyon ti pulisya sadiay Loakan, Baguio City wenno iti Baguio Memorial Chapel para iti posible a panakabigbig daytoy.
