Manamnama a maiyawid ti bangkay ni Patrolman John Lorenzo Togay-an Jr. iti pagtaenganda idiay Lengaoan, Buguias, Benguet inton bigat, Disyembre 9.
Ni Patrolman Togay-an ket maysa kadagiti tallo a pulis a pimmusay kalpasan a nalmes dagitoy idi limned ti bangka a naglugananda idiay Lubong, Langnao, Calanasan, Apayao idi Disyembre 6.
Immunan a naiyawid ti bangkay dagiti dua pay a pulis a da Pat. Halterlic Pallat manipud Apayao ken Pat. Resty Bayog manipud Kalinga.
Iti immuna nga interview ti Bombo Radyo kenni Police Lieutenant Brendon Batoon ti Calanasan Police Station, kinunana a maysa a team a buklen ti walo a pulis manipud iti 2nd Apayao Provincial Mobile Force Company (PMFC) ti mangipatungpal koma iti follow-up investigation ken mangiserbi iti arrest warrant kontra iti maysa a suspek iti shooting incident idi Disyembre 6 idi napasamak ti insidente.
Sigun iti nasao nga opisyal, bayat a daldalyasaten dagiti walo a pulis ti karayan ket nalned ti bangka dagitoy gapu iti napigsa nga ayos ti danum nga intunda ti nagtultuloy a panagtudo idiay Apayao.
Lima a pulis ti nakalasat iti nasao nga insidente bayat a tallo dagiti pimmusay.
Immuna a nasarakan ti bangkay ni Pat. Pallat idi metlaeng Disyembre 6 idiay Kabugao, Apayao bayat a nasarakan met ti bangkay ni Pat. Bayog idi kalman, Disyembre 7 iti paset ti Barangay, Musimut Kabugao, Apayao.
Naudi a nasarakan ti bangkay ni Pat. Togay-an Jr. itay laeng agsapa iti paset ti Barangay Lower Atok, Flora, Apayao.
Impeksa met ni PCol Arnold Razote, Apayao Provincial Director ti pannakipagladingitna kadagiti naulila a pamilya ken impanamnamana ti kaskenan a tulong.
