BOKOD, BENGUET – Nasarakanen ti bangkay ti 29-anyos a sales representative a nalmes iti Banao River idiay Ansodeng, Ambuklao, Bokod, Benguet.
Maibasar iti report ti Bokod Municipal Police Station, nasarakan ti bangkay ti biktima itay agsapa, 8:40 am, Disyembre 10.
Immunan a nabigbig ti biktima a ni Val Raymundo Pedring, residente ti Sapsing, Beckel, La Trinidad, Benguet.
Maibasar iti imbestigasyon dagiti otoridad, alas dose ti pangaldaw idi Disyembre 9, napan ti biktima ken dagiti lima a kakadwana iti nasao a karayan tapno agpicnic.
Ditoy met a nag-iinom ti biktima ken dagiti kakadwana.
Alas singko ti malem iti nasao nga aldaw ket nagdesisyon ti grupo nga aglangoy nu sadino immuna a naglangoy ti biktima ngem saanen a nakita daytoy.
Nagkiddaw met iti tulong dagiti kakadwa ti biktima ken dagus met a nagresponde ti backhoe operator ken dagiti bystanders.
Nupay kasta, napaayda a mangbiruk iti biktima gapu iti napigsa nga ayos ti danum.
Narekober laeng ti bangkay ti biktima idi agsapa ken naiyawid daytoy iti pagtaenganda idiay Beckel, La Trinidad, Benguet.
