Malamlamayan itan ti bangkay ti dua a pimmusay nga indibidual gapu iti vehicular accident a napasamak idiay Sitio Jappas, Brgy. Bobok-Bisal, Bokod, Benguet alas tres ti parbangon idi kalman.
Iti interview ti Bombo Radyo kenni Police Captain Juliet Kaniteng, Office-in-Charge ti PNP Bokod, Benguet, kinunana a naiyawid ti bagi ti dua a pimmusay iti pagtaenganda idiay Tabuk City, Kalinga idi kalman ti rabii.
Dagitoy ket agina a da Sison Paut, 55-anyos, ken ni Chacami Paut, 75-anyos.
Sigun kenni Police Captain Kaniteng, dimmalan iti Ambuklao Road dagiti biktima paturong iti siudad ti Baguio kaduada ti dua pay a pasahero ken iti drayber idi nakapasar ti naglugananda iti mapapati a “mechanical defect” a nangitunda iti pannakatnagda iti nasurok 300-meter ti kaunegna a rangkis iti nasao a lugar.
Gapu iti kauneg ti rangkis, nakaro a nadadael ti lugan ken rason ti ipupusay ti nasao nga indibidual ken ti pannakadangran ti drayber ken ti dua pay a pasahero.
Iti agdama, agpatpataming ti drayber ken ti dua a pasahero a saanen a nainaganan iti Baguio General Hospital and Medical Center.
Karaman kadagiti dagos a nagreponde idi napamasak nga insidente ket dagiti kameng ti Bokod Municipal Station, MDRRMC-Bokod, concerned citizen, ken dadduma pay.
Kabayatanna, nagpalagip met ni Police Captain Kaniteng kadagiti amin a motorista nga i-check ti BLOWBAGETS wenno ti panangsukimat iti brakes, oil, water, battery, air, gas, engine, tires, ken ti self wenno bukod a bagi.
Malaksid iti dayta, impalagipna pay a kanayun nga ammuen ti weather condition ti maysa a lugar tapno mapagsaganaan.
Nagyaman met daytoy kadagiti amin a residente iti Bokod, Benguet iti agtultuloy a ken kidkiddawenna kadagitoy a makitinnulongda nga ipadamag ti kapada nga insidente tapno napartak ti panagresponde dagiti kameng ti Bokod MPS.
