Nakamansayag ita ti bangkay ti drayber ti 24-wheeler gas tanker a simmabog ken nangitunda iti uram sadiay Puguis La Trinidad, Benguet iti maysa a morge iti nasao a munisipyo.
Iti eksklusibo a panakiuman ti Bombo Radyo kenni Mayor Romeo Salda ti La Trinidad, Benguet, kinunana a manarimaan ti koordinasyon dagitoy iti pamilya ni Edgar Ocan Bon, 52-anyos, ti drayber ti tanker para iti panakaiyawid ti bangkayna sadiay Samar.
Kinuna pay ni Mayor Salda a ti pahinante a ni John Lester Bon Canuto, 22-anyos, tubo ti Mercedes Camarines Norte a milagro a nakalasat iti nasao nga insidente ket naituding a maipasidong iti counseling kalpasan ti trauma a nasagrap daytoy.
Dumanon metten iti agarup P11.4 million ti danyos ti napasamak a panagramaram ti uram sadiay Puguis La Trinidad, Benguet gapu ta dumanon iti innem a pasdek ti napuuran nu sadino tallo kadagitoy ket partillay burned bayat a tallo met ti totally burned.
Dagiti totally burned ket pakairamanan iti maysa nga auto repair shop, maysa a sari-sari store, ken maysa a pagtaengan.
Kabayatanna, dagus met a naipaay ti kaskenan a tulong kadagiti naapektaran iti nasao nga uram ken sumagmamano kadagitoy ket temporaryo nga agnanaed iti Rural Health Unit La Trinidad, Benguet.
Agyamyama met ni Mayor Salda kadagiti nagduduma nga ahensiya a nagipaay tulong para iti panakasebseb ti uram a dumanon iti mano nga oras sakbay a naideklara ti fire out.
Maipalagip a napasamak ti uram kasaruno ti panakanaidungpar ti imanmaneho ni Edgar a 24-wheeler gas tanker a naglaon iti 40-K a litro ti petrolyo iti maysa a warehouse idiay Puguis, La Trinidad, Benguet iti oras ti 12:53 iti parbangon.
