BAGUIO CITY – Naiyawiden sadiay Tabuk City, Kalinga dagiti bangkay ti dua a lallaki a nasarakan iti lote a pagaraban dagiti dingwen iti nagbeddengan ti Buluan, Conner, Apayao ken Cato, Tuao, Cagayan idi kalman.
Nabigbig dagitoy a da Justin Abiddao Gracia, 15-anyos, estudyante, residente ti Nambaran, Tabuk City, Kalinga ken Jessie James Ramirez Ola-ao, 21-anyos, estudyante, residente ti Dagupan West, Tabuk City, Kalinga.
Iti interview ti Bombo Radyo Baguio kenni PLt. Carolyn Domyong, Officer-in-Charge ti Conner Municipal Police Station, kinunana a mismo a ti ina ni Gracia ti nangbigbig iti daytoy bayat a ti uliteg ni Ola-ao ti nangbigbig met iti daytoy.
Sigun kenkuana, manarimaan ti panag-jogging dagiti pulis sadiay idi nadlawda dagiti marka ti dara iti kalsada agingga a sinurotda dagitoy ken sadiay a nakitada ti dua a bangkay.
Agpada a nakatali ti ima dagiti dua babaen iti duct tape ken nabalkot ti ulo dagitoy iti nangisit a garbage bags.
Dagus nga improseso dagiti personnel ti Crime Laboratory ti Apayao PPO dagiti bangkay ken sadiay a naduktalan a nagsagrap ni Gracia iti dua a tama ti bala ti paltog iti ulo bayat a nagsagrap ni Ola-ao iti innem a tama ti bala ti paltog iti ulo.
Imbinglay ni Lt. Domyong nga iti imbestigasyonda ket naamuan a nagpakada ti 15-anyos a biktima iti inana idi May 6 tapno dumar-ay iti pasken iti kabangibang nga ilida agingga a saanen daytoy a nagawid.
Innayonna a nakikoordinarda metten iti Kalinga Police Provincial Office tapno maamuan no adda ti kaso dagiti dua a biktima kas paset ti naun-uneg nga imbestigasyon ti insidente.
Sigun pay kenkuana, kitkitaenda no ti nakasarakan dagiti bangkay ket ti main crime scene wenno naibelleng laeng dagitoy sadiay.
