BAGUIO CITY–Naiyawiden iti pagtaenganda sadiay Palina, Kibungan, Benguet ti bangkay ti kailyan a na-comatose ken pimmusay sadiay Gwangju, South Korea.
Immuna iti daytoy, naamuan nga idi February 22 ket nagbakbakwar ken naulaw ni Jane Diclas Botay a maysa a factory worker sadiay SoKor ken iti panangitarayda iti daytoy iti pagagasan ket naduktalan a pimtok dagiti adu nga urat iti utekna a nangitunda iti panaka-brain dead daytoy.
Naamuan pay a na-stress ni Botay gapu iti nakaro a panagdandanag daytoy gaputa naamuan a TNT daytoy ken adda ti issue nga adda ti mangipakemmeg kadagiti TNT sadiay.
Nagyaman met ti Cordillera Community sadiay Gwangju kadagiti amin a nangipaay iti nagduduma a kita ti tulong iti pamilya Botay nangruna iti panakaiproseso iti panakaiyawid ti bangkay ken iti pinansial nga aspeto iti panakaibantay wenno panakalamayna daytoy malaksid pay iti nabusbos iti ospital.
Naamuan a nasurok dua a tawen nga agtatrabaho ti nasao a kailyan sadiay South Korea, kaduana ti asawana.
