BAGUIO CITY – Nabigbigen ti bangkay ti maysa a lalaki a nasarakan iti Circumferential Road, Lower Balacbac, Sto. Tomas Proper, Baguio City idi agsapa ti Dominggo, Oktubre 25.
Daytoy ni ERWIN CALDITO TANGO, 28-anyos, awanan iti trabaho, tubo ken residente ti Kapangan, Benguet.
Maibasar iti report ti Baguio City Police Office Station 10, nabigbig ti lalaki babaen iti ina daytoy a ni Jocelyn Caldito Tango, agtawen iti 48, mannursuro ken residente ti Purok 1, Pinsao Proper, Baguio City.
Positibo a binigbig ti ina ti anak daytoy kalpasan a nakitana ti post iti facebook page ti Bombo Radyo-Baguio ken kalpasanna ket nagturong daytoy iti puneraria para iti berepikasion.
Sigun iti kabsat ti biktima a ni Ivan Caldito Tango , naudi a nakitana ti kabsatna a ni Erwin iti agsapa ti Oktubre 22 a magmagna iti kalsada sadiay , La Trinidad.
Kinuna met iti ina a saanna a nakitkita ti annakna a ni Erwin Tango manipud iti maikadua a lawas ti Setiembre ken naudi a komunikasyon dagitoy ket idi Oktubre 21, 2020.
Sigun iti BCPO Station 9, saanen a maituloy a maipasidong iti otopsiya ti bangkay kalpasan a nagpirma iti waiver ti ina daytoy.
