BAGUIO CITY – Agtultuloy ti panangimbestigar dagiti pulis iti panakapapatay ti maysa a mannalon a naibelleng ti bangkayna iti rangkis iti Baguio-Bontoc Road sadiay Km. 39, Halsema Highway, Abiang, Atok, Benguet itay laeng nabiit.
Nabigbig ti biktima a ni Geronimo Toyaoan, 26-anyos, mannalon ken residente ti Bucao, Abiang, Atok.
Sigun iti Atok Municipal Police Station, nasarakan ti dua a residente ti nasao a bangkay gapu iti saan a napintas nga ayamuom nga agtataud iti nasao a disso.
Iti panangiproseso ti PNP-SOCO ket naamuan a nagsagrap ti bangkay iti innem a bagsol iti nagduduma a paset ti bagina sakbay a naibelleng iti rangkis.
Atapen met dagiti pulis a robbery ti napasamak gaputa mapukpukaw ti agarup P30,000 a kuarta ti biktima.
Nupay kasta, mangipatpatungpalda iti naun-uneg nga imbestigasyon iti dadduma pay nga anggulo kalpasan nga adda dagiti nagparang a testigo iti nasao nga insidente.
Naamuan a daytoy ti umuna a gundaway nga adda ti naibelleng a bangkay iti masakupan ti Atok.
