BAGUIO CITY – Umap-apela ti Baguio City Police Office (BCPO) – Station 8 kadagiti mapukpukawan ti kapamilya para iti panagturongda iti nasao nga istasyon tapno bigbigen ti nasarakan a bangkay ti lalaki iti waig nga iti asideg ti Kennon Road Viewdeck sadiay Camp 7, Baguio City.
Sigun kenni PCapt. Roger Kurt Pacificar, commander ti BCPO-Station 8, nakaawatda ti tawag manipod iti maysa a maseknan nga umili mainaig iti nasarakan dagitoy a bangkay idi kanikadua, May 25.
Kinunana nga iti panagresponde dagiti pulis ket nadanunanda ti bangkay a tumtumpaw iti danum ken idi inya-onda ket nakita a lamo-lamo ti bangkay a mapatta-patta nga agtawen iti nasurok duapulo.
Dinakamatna nga awan met ti nasagrap ti biktima nga external wounds malaksid laeng iti garumiad iti ulo daytoy.
Sigun kenkuana, awan paylaeng ti pakabigbigan ti bangkay ken awanan daytoy ti dadduma a pagilasinan gaputa awanan ti tattoo.
Iti agdama, adda ti bangkay iti Baguio Memorial Chapel ken maur-uray paylaeng ti resulta ti otopsiya iti daytoy.
