BAGUIO CITY–Saan pay laeng a nabigbig ti bangkay ti lalaki a nasarakan iti igid ti kalsada sadiay Balacbac, Santo Thomas, Baguio City idi kalman.
Sigun kenni PSI Elly De Vera, Station Commander ti BCPO Station 10,
nasarakan ti bangkay ti lalaki pasado alas sais iti sardam idi kalman.
Kinunana nga awan ti nasarakanda a pakabigbigan ti biktima.
Nakasuot daytoy iti blue a T-shirt, nangisit a pantalon , brown a sapatos, agtayag iti 5’ 2”, medium built ken mapattapatta nga agtawen iti 40.
Maibasar iti inisial a panagsukimat dagiti kameng ti Scene of the Crimes Operatives, nabekkel ti lalaki babaen iti sinturon ken adda metlaeng ti nakita a dunor iti ulona babaen iti screw ken adda iti gasgas kadagiti tagyagna.
Narekober met dagiti pulis ti maysa a sachet a naglaon iti mapapati a napagango a bulong ti marijuana.
Naiturong ti bangkay iti punerarya sadiay Naguilian Road.
