BAGUIO CITY–Saan pay laeng a nabigbig ti kinasiasino ti pimmusay a lalaki sadiay Tacay Road, Baguio City iti kanikadua kalpasan a limmaban kontra kadagiti pulis.
Sigun kenni PSI Arnold Lising, dadaulo iti BCPO Station 2, agtaltalinaed pay laeng iti maysa a punerarya sadiay Naguilian Road ti bagi ti lalaki.
Kinunana a maatap nga agtatakaw ti napapatay a lalaki gapu kadagiti narekober a kagawaanna iti imetna a backpack.
Immuna iti daytoy, nakaawat iti report ti BCPO Station 2 seknan iti presensia ti maysa a mapagduaduaan a lalaki iti nasao a lugar.
Iti panagresponde da PSI Arnold Lising, kinunana a daytoy mismo ti nagkumprontar iti nasao lalaki ngem killat a nagpatutok daytoy iti paltog ken ginandatna ti aglibas.
Gapu iti daytoy, napilitan met a nagpaputok dagiti pulis kabayatan ti panangkamatda iti lalaki.
Narekober dagiti pulis ti 2 a dolyar, P300 a cash, steel scissors, plier, screw bar ken ti inaramatna a .38 caliber revolver.
Iti met panagsukimat ti SOCO, naamuan a nagsagrap ti lalaki iti innem a tama ti bala ti paltog iti nagduduma a paset ti bagina.
