BAGUIO CITY – Agingga ita ket saan pay laeng a nabigbig ti bangkay ti maysa a lalaki a nasarakan sadiay Purok 3, Tuding Road, Outlook Drive, Baguio City idi kalman ti agsapa.
Maipalagip a nakita laengen ti maysa a concerned citizen ti nasao a bangkay idi adda ti nabangsit a naangot daytoy nga agtataud kadagiti puon ti saba iti nasao a lugar.
Maibasar iti report, naiwa wenno nasugat ti tengnged ti nasao a bangkay ken dandanin maisina ti ulo daytoy a nabalkut iti supot ken jacket.
Ti bangkay ket nakasuot iti maroon sweat shirt, puraw a t-shirt with stripe, nangisit nga slack ken addaan iti tribal ken circle a tattoo iti kannigid nga abaga daytoy ken 777 tattoo.
Mapatttapatta nga agtawen ti biktima iti 25 aginggat 30 ken agtayag daytoy iti 5 feet aginggat 5’8.
Iti agdama ket agtaltalinaed ti nasao a bangkay iti Bahay Damayan sadiay Marcos Highway ken maur-uray ti panagturong sadiay dagiti kakabagianna.
Umap-apela met dagiti otoridad iti asinoman a mapukpukawan iti kabagian nga agturongda laeng iti nasao a lugar tapno bigbigenda ti nasarakan a bangkay.
