BAGUIO CITY – Nasarakan ti bangkay ti maysa a minero iti uneg ti comfort room ti maysa a dakkel a panganan iti syudad sadiay Lapu-Lapu Street, Kagitingan Barangay, Baguio City idi kalman.
Nabigbig daytoy a ni Hermes Imbetan, 26-anyos, tubo ti Sabangan, Mt. Province ken residente ti Balsigan, Baguio City.
Maibasar iti imbestigasion, ur-urayen ti janitor a bummassit ti tao a nakapila iti comfort room tapnu agdalus.
Nupay kasta, nabayag a rumuar ti adda iti uneg ti maysa a cubicle isut gapuna nga inulida daytoy ken sadiay a nakitada ti dara-dara a bangkay ti nasao a lalaki.
Naamuan a nagsagrap ti lalaki iti dua a bagsol partikular iti kannigid a paset ti tengnged ken iti barukong daytoy.
Dagus met a nagpaarayatda iti kapulisya ken iti Emergency Medical Services ngem naideklara a pimmusay ti nasao a lalaki.
Nakasarak ti Scene of the Crime Operatives ti pulisya iti maysa a kutsilyo nga agatiddog iti 10.5 inches manipud iti timba iti nasao a comfort room.
Iti agdama ket manarimaan paylaeng ti imbestigasyon ti pulisya iti nasao a kaso ken ti panaka-adal ti CCTV camera a naimuntar iti nasao a pasdek.
