BAGUIO CITY- Nadiskobre ti militar ti bangkay ti political officer/political instructor ti Komiteng Larangan Guerilla (KLG) Baggas ti Ilocos-Cordillera Regional Committee (ICRC) ti Communist Party of the Philippines-New People’s Army (CPP-NPA) sadiay Babacong, Gawa-an, Balbalan, Kalinga idi kalman.
Nabigbig ti nasao nga opisyal ti CPP-NPA a ni Rudy Daguitan alyas Pinpin a mapapati a pimmusay iti panakirinnupak dagiti rebelde kadagiti kameng ti 50th Infantry Battalion (IB), Philippine Army (PA).
Nailanad iti report ti 5th Infantry Division (ID), PA a nakita ti nasao a bangkay, pakairamanan ti maysa a paltog manipud iti kampo nga imbati dagiti nagsanod a rebelde.
Agpatpatrolya dagiti soldado iti nasao a lugar idi pinalpaltogan dagitoy ti dumanon agarup nasurok 20 a rebelde nga idadauluan ti managan alyas Mio ti Platoon Guevara, KLG Baggas ti ICRC ti CPP-NPA.
Nagsisina dagiti rebelde kalpasan ti sumagmamano a minutos kabayatan ti engkwentro. Agtultuloy met ti clearing ken pursuit operation ti militar kadagiti posible a nagnaan dagiti naglibas a rebelde.
Kinuna met ni Col. Santiago Enginco, commander ti 503rd Infantry Brigade, PA a dakkel a pukaw iti CPP-NPA ti panakatay ni Daguitan gaputa mapilay ti panag-doktrina ken panakaisuro ti ideolohiya a komunismo kadagiti rebelde ken kadagiti umili a mangsupsuportar kadagitoy.
Mangnamnama pay ni MGen. Laurence Mina, commander ti 5th ID, PA nga agserbi nga adal kadagiti nabatbati a kameng ti CPP-NPA ti napagteng ni Daguitan.
Impettengna a pammaneknek ti napasamak kenni Daguitan a saan a maipapaayan iti pateg dagiti miembro ti rebelde a grupo. Kagiddan iti daytoy ket al-allukuyenna latta dagiti nabatbati pay a rebelde iti panagsukodan iti gobyerno tapnu mangabaruananda metten sakbay a maudi ti amin.
