BAGUIO CITY – Manamnama a maiyawid iti pagtaenganda ditoy Baguio City ti bangkay ti kailyan nga Air Force Major a karaman kadagiti pimmusay iti panakatnag ti helicopter sadiay Lantawan, Basilan.
Immunan a nabigbig daytoy a ni Air Force Major Jessie Miller Jr. a pilot in command ti natnag a Sikorsky S-76A Rescue Helicopter.
Ni Miller ket kameng ti PMA Class of 2010 ken dimmakel sadiay Kias ditoy Baguio City.
Sigun kenni Jumel Miller, kasinsin ti pimmusay a banuar, urayenda ti panakaiyawid sadiay Kias ti bangkay ni Major Miller inton Sabado.
Kinunana a nagturong sadiay Pampanga ti nagganak ti soldado tapnu pasangbayen wenno sabten ti bangkay manipud Mindanao.
Itay laeng agsapa ket naipaayan iti military honors ni Maj. Miller Jr. babaen iti maysa a seremonya iti Clark Air Base sadiay Mabalacat City, Pampanga.
Maipalagip pay a malaksid kenni Maj. Millet Jr. ket karaman a pimmusay iti insidente da 1st Lieutenant Mack-ar Ferrer, SSg. Miguel Banas Jr. ken 2Cl Benedicto Leal Jr.
Agturong kuma ti helicopter sadiay Jolo para iti medical evacuation mission idi natnag daytoy. (with reports from Bombo Florence Paytocan)
