BAGUIO CITY – Naiyawiden ken naitabon sadiay Balbalan, Kalinga ti bangkay ti maysa kadagiti dua a miembro ti NPA a napapatay kabayatan ti ingkwentro iti nagbaetan ti NPA ken ti militar sadiay Barangay Mainit, Mt. Province.
Binigbig ti 503rd Infantry Brigade ti pimmusay a ni Wilfredo Gaayon alyas Jaz/Jas/GG/Jandi, squad leader ti Kilusang Larangan Guerilya – AMPIS, ICRC.
Ni Gaayon ken ti kadwana a ni Ernesto Lucaben ket napapatay kabayatan ti 30 a minutos a rinnupak ti grupoda ken iti grupo ti militar idi Setyembre 28.
Napasamak daytoy idi inyuman dagiti umili kadagiti otoridad ti presentia ti NPA iti masakupanda a komunidad.
Kalpasan ti armed encounter a nangitunda iti ipupusay dagiti dua, naiyawid ni Gaayon sadiay Balbalan bayat a naiyawid ken naitabon metlaeng ni Lucaben sadiay Ilocos Sur.
Impanamnama met ni 503rd Infantry Brigade Information Officer, Captain Rogelio Agustin Jr. a makiyum-umanda kenni Provincial Administrator Atty. William Puday para iti panakaipaay ti tulong iti pamilya ni Gaayon.
