BAGUIO CITY–Nainget a maim-imbestigaran ti insidente ti bankay ti lalaki a nasarakan dagiti otoridad iti agarup 30 a metro ti kaunegna a rangkis sadiay camp 3, Kennon, Tuba, Benguet idi malem kalman.
Iti panakipatang ti Bombo Radyo kenni Police Major Dominador de Guzman Jr., hepe ti Tuba Municipal Police Station, kinunana a nadanonanda ti bankay ti lalaki a narunoten ti ulona ken agrugin nga agruprupsa ti bagina.
Kinunana a dagos a renespodean ti nagduduma a unit ti pulisya ti insidente kalpasan a nakaawat dagitoy iti report manipud iti maysa nga escavanger a nakakita iti nasao a bankay.
Awan ti nakita dagiti otoridad nga aniaman nga identification cards iti disso malaksid laeng a nakasuot ti lalaki iti nangisit a brief ken sweatshirt.
Agtayag ti bankay iti 5’6 agingga 5’7 feet, nalukmeg, addaan tattao iti likod a paset ti bagina ken kanigid nga ima daytoy.
Mamati ni Pol. Major De Guzman a nabayagen ti bankay iti rangkis gapu iti estado ti bagi daytoy.
Naiturongen ti nasao a bankay iti maysa a Funeral Home iti nasao a lugar.
Makikokoordinar metten ti pulisya kadagiti Baragay Officials ti Kennon Road, Tuba, Benguet tapno tumulongda iti imbestigasion para iti pakabigbigan ti bankay.
Maipalagip a daytoyen ti maikatlo a bankay a nasaraka iti nasao nga ili ita a tawen no sadino ti umuna a bankay ket maysa a senior citizen ken nabigbigen bayat a ti maikadua ket bankay ti babai nga agingga ita ket saan pay a nabigbigbig.
