BAGUIO CITY – Pimmusay ti maysa a negosyante ken ti kabagianna kalpasan a pinalpaltogan dagitoy ti maysa a kapitan ti barangay iti disco bar sadiay Calaba, Bangued, Abra idi parbangon.
Nabigbig dagiti biktima a da Elpidio Barbadillo Castillo Jr., 49-anyos, naasawaan, agtagikua iti disco bar a nakapasamakan ti krimen ken ni Nonilo Billedo, 31-anyos, baro, awanan trabaho, agpada dagitoy a residente ti Bangbangar, Bangued.
Nabigbig met ti suspek a ni Punong Barangay Joel Bayle Mailed, 59-anyos, naasawaan ken residente ti Calaba, Bangued.
Sigun iti pulisya, nagturong ti suspek a nakainom iti arak ken dagiti kaadwana iti disco bar ni Castillo babaen iti maysa a van.
Kinasarita ti suspek ni Castillo para iti panakairikep ti disco bar agingga a timmaud ti nabara nga argumento dagitoy.
Ditoy a killaat a pinalpaltogan ni Mailed ni Castillo iti sumagmamano a daras ken nairaman pay a natamaan ni Billedo.
Naimatangan daytoy ti alert team ti Bangued PNP isut gapuna a ginandatda nga anawaen ti suspek ngem pinalpaltogan ti suspek dagitoy a nagresulta tapnu paltoganda met ti suspek.
Naitaray dagiti biktima ken suspek iti ospital ngem naideklara a dead on arrival ni Billedo bayat a pimmusay ni Castillo kabayatan ti panakatamingna.
Natamaan met ti ulo ken likod ti suspek nga ita ket adda iti ospital.
Narekober met iti crime scene ti maysa a caliber 45 pistol a naglaon ti maysa a bala, lima a basyo ti bala ti caliber 45, maysa a deformed slug ken dua a basyo ti caliber 9mm.
Sigun iti pulisya, saan a panagkinnaawatan gapu iti panakabartek ti motibo ti krimen. (-with Bombo Brigitte Marcasi)
