Agtultuloy ti offsite registration para iti Barangay ken Sk Election sadiay La Trinidad Benguet.
Iti interview ti Bombo radyo kenni Grace Faustino Election officer ti La Trinidad Benguet, kinunana a nangipatungpalda ti outreach offsite registration kadagiti babarangay ti munisipyo tapno mairehistro amin dagiti indibidual nangruna dagiti new voters para iti 2023 barangay ken Sk Election.
Sigun pay iti opisyal, punteryada ti nasurok sangaribu nga indibidual nga agparehistro sakbay a malpas ti naituding nga election registration period inton Enero 30, 2023.
Iti agdama mapatta-patta a dumanonen iti 400 nga indibidual ti nagparehistro nu sadinno adda pay ti 70% a nabatbati a punteryada a makapagrehistro iti offsite registration ken iti opisina ti COMELEC.
Kabayatanna, pito a pagadalan iti nasao nga munisipyo ti nakipaset iti offsite ken satellite registration nu sadinno punteryada nga agparehistro dagiti studyante para iti Sk Election.
Kagiddan dayta, nangipatungpal met ti COMELEC La Trinidad ti offsite registration para kadagiti Persons Deprived of Liberty kadagiti tallo a jail facility iti munisipyo.
Impeksa pay ni Election Officer Faustino, awan met ti nagbalin a problema bayat ti agtultuloy nga offsite registration iti nasao nga munisipyo.//hana
