BAGUIO CITY – Im-imbestigaran ita dagiti otoridad ti pakabigbigan dagiti suspek ken ti motibo dagitoy iti panangpalpaltogda iti maysa a barangay kagawad ken anti-corruption advocate ditoy rehiyon Cordillera a nagresulta iti ipupusayna idi rabii.
Napasamak ti krimen iti mismo a sangwanan ti pagtaengan ti pamilya ti biktima a ni Salvador Liked sadiay Gutang, Balintaugan, Bauko, Mountain Province.
Ni Liked ket agdama a barangay kagawad ti Balintuagan, Bauko ken secretary ti Cordillera Chapter ti anti-crime watchdog a Citizen Crime Watch.
Maibasar iti report ti pulisya, rimwar ni Liked manipud iti balayda tapnu agturong kuma iti maar-aramid a balayna idi pinalpaltogan daytoy ti dua a saan pay a nabigbig a suspek.
Dagus a pimmusay ti biktima gapu kadagiti nasagrapna a tama ti bala ti paltog iti nagduduma a paset ti bagina.
Dagus metlaeng a naglibas dagiti suspek kalpasan ti panangpalpaltogda iti biktima.
Nasarakan iti crime scene ti sumagmamano a basyo ti bala ti caliber 45 a paltog.
Maipalagip a limmatak ni Liked gapu kadagiti panangibutaktakna kadagiti anomalya kas iti korapsion kadagiti nagduduma a lokal a gobyeno ken ahensia ti gobyerno a nagresulta iti panakaipila ti kaso a korapsion sadiay Office of the Ombudsman kontra kadagiti sumagmamano nga opisyales dagiti lokal a gobyeno ken dagiti ahensiya ti gobyerno.
