BAGUIO CITY – Pimmusay ti maysa a kagawad ti Barangay Immuli sadiay Pidigan, Abra kalpasan a napaltogan daytoy sadiay Banay, Banggoc, Pidigan, Abra.
Nabigbig daytoy a ni Victor Dela Cruz Pisco.
Sigun iti Abra PNP, nairaman met laeng iti pammaltog ti asawa ti biktima a nabigbig a ni Elida Sales Pisco, barangay captain ti Immuli ken ti babae a kabsat ti biktima a nabigbig a ni Myrna Pisco.
Maibasar iti report, nakalugan dagiti biktima iti maysa nga elf truck ken dumaldalyasat ti lugan iti Pidigan-Pilar Provincial Road paturong sadiay Barangay Immuli idi adda ti nag-overtake a motorsiklo a mapapati a nangpalpaltog kadagiti biktima.
Dagus a naitaray iti pagagasan dagiti tallo ngem naideklara a dead on arrival ni Barangay Kagawad Pisco bayat a maob-obserbaran ita ti asawa ken kabsatna.
Iti agdama ket dukduktalen dagiti pulis ti pakabigbigan dagiti suspek ken ti motibo iti pammapatay.
